२१ भदौ, काठमाडौं । लामो समयदेखि बेलायतमा यातनासम्वन्धी मुद्दा खेपिरहेका नेपाली सेनाका महासेनानी कुमार लामाले सफाइ पाएका छन् ।

दुई ट्रायलपछि यो फैसला आएको हो, जसको लागत एक मिलियन पाउण्ड अर्थात १४ करोड रुपैयाँ भन्दा बढी परेको छ ।

अदालतले मंगलबार अब तेस्रो ट्रायल नहुने घोषणा गरेको छ ।

लण्डनस्थित सेन्ट्रल क्रिमिनल कोर्टले कर्णेल लामाका लागि यो अन्तिम सुनुवाइ भएको फैसला सुनाएको छ ।

साथै उनीविरुद्ध अब बेलायतको अदालतमा अर्को कुनै कारबाही प्रक्रिया सुरु गरिने छैन ।

सशस्त्र द्वन्द्वकालमा पक्राउ परेका व्यक्तिलाई यातना दिएको भन्दै लामाविरुद्ध युद्ध अपराधसम्वन्धी मुद्दा लगाइएको थियो । तर, उनले आरोप अस्वीकार गर्दै आएका थिए ।

अदालतले अन्ततः उनीमाथिको आरोपमा प्रमाणित हुन नसकेको फैसला सुनाएको छ । न्यायाधीश स्वीनीले लामा अब स्वतन्त्र भएको र बेलायतको अदालतमा अर्को कारबाही नहुने बताए ।

सशस्त्र द्वन्द्वको समय कपिलबस्तुमा पक्राउ परेका जनक राउतलाई यातना दिएको भन्दै उजुरी परेपछि नेपाली सेनाका कर्णेल लामा २०१३ मा बेलायतमा पक्राउ परेका थिए । शान्ति मिसनमा खटिएका उनी बेलायतमा रहेका परिवार भेट्न जाँदा पक्राउ परेका थिए ।